Noiz argitaratua Astelehena, 2020.eko Martxoa 16

Parlamentuak eraikina itxi, gutxieneko zerbitzuak finkatu, telelana baimendu eta jarduera etenen du hilaren 23tik 29ra bitartean. Neurriak apirilaren 13ra arte luzatzeko aukera egonen da

Parlamentuaren jardueraren murrizketak irauten duen bitartean, aurreikusi da Mahaiaren eta Eledunen Batzarraren bilkurak eta ezinbestekotzat jotzen diren beste organo batzuenak bideokonferentzia bidez egiteko aukera

Nafarroako Parlamentuak gaur, 17:30ean, eraikina eta zerbitzu guztiak itxiko ditu martxoaren 29ra arte. Neurria apirilaren 13ra arte luzatzeko aukera aurreikusi da. Aldi berean, Parlamentuaren jarduera martxoaren 23tik 29ra bitartean deuseztatzen da. Epe hori ere apirilaren 13ra arte luzatu ahalko da, bi kasuetan Mahaiak eta Eledunen Batzarrak baimena eman ondoren.

 

Ildo horretan, Parlamentuaren jarduera apirilaren 13ra arte luzatzen den ala ez erabakitzeko, Mahaiaren eta Eledunen Batzarrak bilera eginen dute martxoaren 27an, ostiralarekin, bideokonferentzia bidez. Gainera, txosten bat eskatu zaie Legebiltzarreko Zerbitzu Juridikoei, jarduerak murrizteko aldian parlamentuko eginkizunak gauzatzeari buruzko gai guztiak ebazteko.

 

Hala ere, baimena emanen zaie gutxieneko zerbitzuak ematen ari diren eta beren lana nahitaez aurrez aurre egin behar duten langileei Parlamentuko egoitzan egon daitezen, bai eta instalazioek behar bezala funtzionatzeko edo larrialdiei aurre egiteko ezinbestekoak diren garbiketako eta mantentze-lanen enpresetako kontingentea sartzeko ere. Hori guztia Foruzaingoak egiten duen zaintza-lana kendu gabe.

 

Forudunen artean, Lehendakariak, Mahaikideek eta Eledunen Batzarrak bakarrik izanen dute egoitzara sartzeko baimena. Salbuespenezko beste edozein errekerimendu egiteko, aldez aurretik lehendakariaren edo Idazkaritza Nagusiaren baimena beharko da.

 

Parlamentuaren jardueraren murrizketak irauten duen bitartean, Mahaiaren eta Eledunen Batzarraren ezinbestekotzat jotzen diren bilkurak bideokonferentzien bidez egin ahal izanen dira. Era berean, Parlamentuko lehendakariak eta gobernu-taldeak Parlamentuko beste organo batzuen bilkura zehatzen deialdia baloratu ahal izanen dute, betiere ezinbestekotzat jotzen diren urgentziazko arrazoiengatik bada. Nolanahi ere, haien segurtasuna bermatu beharko da, egokitzat jotzen diren mekanismoen bidez.

 

Parlamentuaren egoitza itxita dagoen bitartean, erregistro guztiak modu telematikoan eginen dira. Horretarako, parlamentarioek gaituta duten sistema erabiliko dute, eta gainerako interesdunek, berriz, posta elektronikoko honako helbide hau: erregistroa@nafarroakoparlamentua.eus.

 

Gainera, etenda geratzen da gaur egun izapidetzen ari diren Parlamentuko gai guztien izapidetzea, horien epeak barne. Ondorio horietarako, dagokion epearen zenbaketa eten eginen da neurri horiek indarrean jartzen diren unean, eta amaitzen diren unean berrekinen zaio.

 

Administrazio-epeei dagokienez, etenda geratzen dira COVID-19k eragindako osasun-krisia kudeatzeko alarma-egoera deklaratzen duen martxoaren 14ko 463/2020 Errege Dekretuaren hirugarren xedapen gehigarriaren arabera.

 

Era berean, jendeari arreta emateko aurrez aurreko zerbitzuak etetea agintzen da. Zerbitzu horiek telefono bidezko arretaren bidez (948 209 209) eta mezu elektroniko hauen bidez (telematika) eginen dira:

erregistroa@nafarroakoparlamentua.eus eta protokoloa@nafarroakoparlamentua.eus

 

Hala erabaki du Nafarroako Parlamentuko presidente Unai Hualdek, Koordinazio Taldeari entzun ondoren. Koordinazio Taldea Ganberako Mahaiak hilaren 12an onartutako Koronabirusaren (COVID-19) aurreko Kontingentzia Planaren babesean eratu zen, eta gaur berriro bildu da, 09:00etan, bere neurriak Gobernu zentralak Alarmako Estatua izendatu ondoren sortutako egoera berrira egokitzeko. Lehendakaritzaren ebazpena Mahaiaren eta Eledunen Batzarrak berretsi du, 10:00etatik aurrera egindako bilkuran.

 

Ezohiko neurri-sorta bat da, eta Kontingentzia Planean (osoko bilkuretara, Mahaiaren eta Eledunen Batzarraren bilkuretara eta agerraldietara mugatzea jarduera) hasieratik jasotakoak hobetzen ditu. Joan den ostegunean onetsi zen, lehen orduan, eta ordu batzuk geroago gutxienekoen erregimenarekin osatu zen (Mahaia eta Eledunen Batzarra, ordutegi-malgutasuna). Orain, Parlamentuko lanak erabat eteten ditu (gutxieneko zerbitzuak, telelana).

 

Ohiz kanpoko euste-neurriak martxoaren 29tik aurrera luzatu behar badira, oro har, telelanaren sistema ezarriko da Nafarroako Parlamentuko ahal den langile guztientzat, eta horrek ekipamendu informatikoak erostea eta zerbitzuak emateko arauak onestea eskatuko du. Hori guztia, besteak beste, beharrezkoa izanez gero, bideokonferentzia bidezko Osoko Bilkurak eta Mahaiaren eta Eledunen Batzarraren bilkurak egin ahal izateko.

 

Bien bitartean, astearte honetatik (hilak 17) aurrera, gutxieneko zerbitzu batzuk ezarri dira ezinbesteko jarduera parlamentarioak edo administratiboak emateko. Honako hauek, besteak beste: erregistro telematikoaren arreta; Mahaiaren eta Eledunen Batzarraren edo gainerako organo parlamentarioen deialdiak; Parlamentuaren gai eta erabakien izapidetzea, kudeaketa, betearazpena, argitalpena, itzulpena eta jakinaraztea; kontratazioko espedienteak izapidetzea eta nominak kudeatzea eta ordainketak formalizatzea.

 

Koordinazio taldea honakoek osatzen dute: Parlamentuko lehendakariak, kabineteburuak, Mahaiko kide batek, legelari nagusiak, Zerbitzu Orokorretako buruak eta Parlamentuko Segurtasun eta Osasun Batzordeak.

 

 

https://www.parlamentodenavarra.es/eu/komunikazio/nafarroako-parlamentuak-kontingentzia-plan-bat-taxutu-du-koronabirusa-dela-eta

 

https://www.parlamentodenavarra.es/eu/komunikazio/parlamentuak-bertan-behera-utzi-ditu-ostiral-honetako-batzordeak-aretoen

 

https://www.parlamentodenavarra.es/eu/komunikazio/parlamentuko-lehendakariak-bere-agenda-osoa-bertan-behera-utzi-du-datozen-asteetarako