Eledunen Batzarrak adierazpen instituzional bat onetsi du aho batez, Pertsonen salerosketaren aurkako Mundu Eguna dela eta. Podemos Ahal Dugu foru parlamentariek elkarteak aurkeztu du.

Onetsitako adierazpen instituzionalak honako hau dio:

“Nafarroako Parlamentuak, Pertsonen salerosketaren aurkako Mundu Egunean:

1.- Berretsi egiten du pertsonen salerosketa-mota ororen aurkako konpromisoa, munduko herrialde guztiak ukitzen dituena (horra haur soldaduak, lan behartuak egin behar dituzten pertsonak, eskaletasuna, delitu-jarduerak, organoen erauzketa edo sexu-esklabotza).

2.- Uste du beharrezkoa dela Nafarroako Gobernuak prostituzio-egoeran dauden emakumeei eskuratzea etxebizitza, laguntza juridiko eta psikologikoa, arreta soziala nahiz errenta bermatua bezalako baliabide ekonomikoak, halakorik behar baldin badute, bai eta harrera-, informazio- eta arreta-protokoloak ere, ez soilik salerosketaren biktima direnean, ezpada indarkeria matxistaren biktima gisa, 14/2015 Foru Legeak aitortzen duen bezala.

3.- Pertsonen salerosketaren prebentzioan lan egiteko konpromisoa adierazten du, bai eta ikastetxeetan, hezkuntza afektibo-sexualaren eta hezkidetzaren bidez, berdintasunean heztearen aldeko apustuari eustekoa ere.

4.- Nafarroan gertatzen den gizakien salerosketa nahiz sexu- eta lan-esplotazio kasu oro salatzeko konpromisoa hartzen du.”