Nafarroako Parlamentuak bat egiten du aurten ere maiatzaren 17an egin den Homofobiaren, Lesbofobiaren, Bifobiaren eta Transfobiaren Aurkako Nazioarteko Egunarekin
Mahaiak eta Eledunen Batzarrak onetsia. 2020ko maiatzaren 18an
- Eledunen Batzarrak adierazpen instituzional bat onetsi du, zeinaren bidez Nafarroako Parlamentuak bat egiten baitu aurten ere maiatzaren 17an egin den Homofobiaren, Lesbofobiaren, Bifobiaren eta Transfobiaren Aurkako Nazioarteko Egunarekin. PSN, Geroa Bai, EH Bildu, Podemos-Ahal Dugu eta I-Ek aurkeztu dute.
Adierazpena aho batez onetsi da, 5. puntua izan ezik, puntu horretan EH Bildu abstenitu egin baita.
Onetsitako adierazpen instituzionalak honako hau dio:
“1. Nafarroako Parlamentuak bat egiten baitu aurten ere maiatzaren 17an egin den Homofobiaren, Lesbofobiaren, Bifobiaren eta Transfobiaren Aurkako Nazioarteko Egunarekin.
2. Nafarroako Parlamentuak LGTBI+ politikekiko konpromisoa adierazten du, bai eta sexu-orientazioaren adierazpen askearen, genero eta sexu-nortasunaren adierazpenaren aldekoa eta lesbiana, gay, bisexual, transexual, transgenero eta intersexualen aurkako diskriminazio eta indarkeria ororen kontrakoa ere.
3. Nafarroako Parlamentuak bere babesa adierazten die diren modukoak izateagatik jazarpena jasaten duten eta gorroto delituen xede diren LGTBI+ pertsona guztiei.
4. Nafarroako Parlamentuak uste du beharrezkoa dela leheneratze- edo birmoldatze-terapiak desagerraraztea, bai Estatuan bai nazioartean.
5. Nafarroako Parlamentuak uste du egokia dela Estatuko Gobernuak asiloa eta babesa sustatzea beren herrialdeetan jazarpena pairatzen duten LGTBI pertsonentzat.
6. Nafarroako Parlamentuak adierazten du beharrezkoa dela Nafarroako Gobernuak bere konpromisoa betetzea eta Nafarroako ikastetxe guztietan hezkidetza plan bat ezartzen jarraitzea, diskriminazio eta indarkeria mota oro desagerrarazteko tresna gisa, azken xedea izanen duena pertsona guztiek giza eskubide guztiak baliatu ahal izatea. Berdintasuna ez da aukerakoa, gure betebeharra da hura erdiesteko lan egitea.
7. Nafarroako Parlamentuak LGTBI+ Foru Legea garatzeko ekintza plana ezartzea babesten du eta uste sexu-orientazioari, genero-adierazpenari eta sexu- edo genero-nortasunari buruzko prestakuntza beharrezkoa dela administrazio publiko guztietan eta bereziki gizarte-, osasun- eta landa-arloetan”.