NAFARROAKO PARLAMENTUKO BATZORDE IRAUNKORRAK ERABAKI DU ABUZTUKO BEHAR HAINBAT EGUN GAITZEA INBESTIDURA-PROZESUKO BILKURAK ETA URRATSAK EGITEKO

Gaur, Nafarroako Parlamentuko Batzorde Iraunkorrak erabaki du abuztuko behar hainbat egun gaitzea inbestidura-prozesuko bilkurak eta urratsak egiteko.

Batzorde Iraunkorrak bilkura egin du gaur, 2019ko uztailaren 29an, astelehenez, 10:00etan.

Nafarroako Parlamentuko lehendakari Unai Hualde jaunak Nafarroako Foru Komunitateko Gobernuko Lehendakaritzarako hautagaitza bat proposatzeari begira kontsulta-aldi bat izan ondoren Parlamentuan ordezkaritza duten alderdiek edo talde politikoek izendatutako eledunekin, Batzorde Iraunkorrak bilkura bat egin du 12:00etan. Legebiltzarreko lehendakariak María Chivite Navascués andrea proposatu duenez Nafarroako Foru Komunitateko lehendakarigai, Legebiltzarreko zuzendaritza-organoak erabaki du Nafarroako Parlamentuaren Osoko Bilkurarako deia egitea, inbestidura-eztabaida 2019ko abuztuaren 1ean eta 2an egin dadin.

Bestalde, Batzorde Iraunkorrak adierazpen instituzional bat onetsi du, zeinaren bidez Nafarroako Parlamentuak bere arbuiorik erabatekoena adierazten baitu Gogoan eskulturako xaflaren lapurreta dela eta. Geroa Bai eta EH Bildu Nafarroa talde parlamentarioek, Podemos-Ahal Dugu foru parlamentarien elkarteak eta I-E Talde Mistoak aurkeztu dute.

Aldeko botoa PSN, Geroa Bai, EH Bildu Nafarroa, Podemos-Ahal Dugu eta Izquierda-Ezquerrak eman dute; Navarra Sumak hirugarren puntuaren alde bozkatu du, eta lehenengo eta bigarren puntuetan abstenitu egin da.

Onetsitako adierazpen instituzionalak honako hau dio:

"1. Nafarroako Parlamentuak bere arbuiorik erabatekoena adierazten du Gogoan eskulturako xaflaren lapurreta dela eta. Eskultura hori ezarri zen, xaflan bertan ohartarazten den bezala, 1978ko Sanferminetan pairatutako polizia-erasoaren biktimen oroimenez; eta, memoriaren toki gisa erregistratutako elementua den aldetik, lege-babes berezia dauka.

2. Nafarroako Parlamentuak adierazten du bere borondatea dela ukitutako erakundeek neurri egokiak har ditzaten gertatutakoa argitzeko, eraso horren egileei kasuko neurri administratiboak aplikatzeko eta xafla berehala birjar dadin bermatzeko.

3. Nafarroako Parlamentuak bere konpromisoa berresten du Nafarroako Memoria Historikoaren Tokiei buruzko abenduaren 26ko 29/2018 Foru Legearekiko eta Nafarroako memoria historiko eta demokratikoaren sustapenarekiko”.