Nafarroako Parlamentuko lehendakari Unai Hualdek eta Bakea eta Askatasuna Saharan askotariko parlamentari taldeko koordinatzaile Carlos Guzmánek gaur Legebiltzarraren egoitzan hartu dute Hamadi Mansor, Fronte Polisarioaren ordezkari berria Foru Komunitatean. Mohamed Gahilani ordezkariordea ere izan da.

Hamadi Mansorek azaldu duenez, protokolo, aurkezpen eta esker oneko bilera izan da. Sahararruientzat, Nafarroako Parlamentuak “elkartasuna eta tribuna irekia” esan nahi du".

“Mendebaldeko Saharan azken gertaerak partekatzeko aprobetxatu dugun adeitasunezko bisita izan da. Nafarroako laguntza humanitarioa ere eskertu nahi izan dugu, baita Legebiltzarrak sahara herriaren autodeterminazioari emandako babesa ere”, baieztatu du Mansorrek.

Unai Hualdek azpimarratu du legebiltzarrak konpromisoa hartu duela saharar herriak duela hamarkada batzuetatik jasaten duen “larrialdi humanitarioa” konpontzeko, eta, horren harira, eskatu du “konponbide zuzen eta iraunkor bat, Nazio Batuen ebazpenak betetzeari lotua, funtsean”.

Bakea eta Askatasuna Saharan askotariko parlamentari taldeak kide hauek ditu: Carlos Guzmán (Contigo-Zurekin) koordinatzailea, Pedro González (G.P. UPN), Ibai Crespo (G.P. PSN), Irati Jiménez (G.P. EH Bildu), Isabel Aranburu (G.P. Geroa Bai), Irene Royo (G.P. PPN) eta Maite Nosti (A.P.F Vox).

Fronte Polisarioa sahararren nazio askapeneko mugimendua da. Borrokan ari da “Marokok Mendebaldeko Saharan egin duen legez kontrako okupazioa amaitzeko eta autodeterminazioa behingoz lortzeko” saharar herriarentzat, baita beren aberriaren independentzia ere. Testuinguru horretan, ez du onartzen beste konponbiderik NBEk eta Afrikar Batasunak gainbegiratutako erreferenduma baino, aukeretako bat independentzia izanda.

Saharako Arabiar Errepublika Demokratikoa estatu burujabetzat onartu dute 85 herrialdek, gehienbat Afrikan (Afrikar Batasunaren sortzaileetakoa da) eta Latinoamerikan. Beste estatu askok, Europakoak tartean, aitortu dute Fronte Polisarioa dela saharar herriaren ordezkari legitimo bakarra.