Nafarroako Gobernua premiatzen da glukosaren monitorizatze jarraiturako sistemak finantza ditzan
Honek tratamendu zehatz, seguru eta sinpleago bat ahalbidetuko duela eta larrialdiak saihestuko dituela argudiatzen da, aurrekontuei dakarzkion onurez gain
Osasun Batzordeak ebazpen bat onetsi du gaur aho batez, zeinaren bidez Nafarroako Gobernua premiatzen baita “erehala aplika dezan gailu berri horien finantzaketa publikoa (glukosaren monitorizatze jarraiturako sistemena eta glukosaren flash monitorizaziorako sistemarena), Osasun Sistema Nazionaleko Lurralde arteko Kontseiluak 2018ko apirilean hartutako erabakiaren bidez ezarritako indikazioetarako, Osasun Sistema Nazionaleko zerbitzu komunen zorroan jaso daitezen”.
Onetsitako ebazpenak bigarren puntuan, Gobernuari eskatzen zaio “kostu aldetik efizienteagoak diren osasun teknologien ebaluazioko irizpideak erabiltzea, osasun arloko gure profesionalen iritzia kontuan hartuta”.
Horrez gain, eskatzen da “gailu horien erabilerari buruzko berariazko prestakuntza ematea osasun arloko profesionalei, Osasunbidea-Nafarroako Osasun Zerbitzuko laguntza espezializatukoei zein oinarrizko osasun laguntzakoei, eta gailu horiek jasotzea gure erkidegoan erabiltzen diren praktika klinikoko gidetan edo bide klinikoetan”.
Azkenik, eskatzen zen Foru Exekutiboa premiatzea “Osasunbidea-Nafarroako Osasun Zerbitzuko zorro osagarrian jasotzera SED-SEEPen baterako txosteneko indikazioak, aurreko irizpideetan sartuta ez daudenak”. Puntu hau ez da onetsi. Geroa Bai, EH Bildu, Podemos-Ahal Dugu-Orain Bai eta I-Ek aurka bozkatu dute eta UPN, PSN eta PPNk alde.
Zioen azalpenean, PSN talde parlamentarioak sustatutako ebazpenak diabetikoen “zailtasun kronikoak eta bizi kalitatearen galera” aipatzen ditu glukosa interstizialaren denbora errealeko monitorizatze jarraiturako sistemak defendatzeko, tratamendu “seguru eta zehatzagoa” eskaintzen baitute era “sinpleagoan eta minik eman gabe”.
Zentzu horretan, azpimarratzen da “gluzemia modu optimoan eta jarraituan kontrolatzea giltzarri dela gaixotasunaren aurrerabidea eta horrek jomuga-organoetan dituen konplikazioak prebenitzeko, bai eta larrialdi diabetikoak saihesteko ere”. Afera honek diabetesaren zuzeneko kostuetan eragina dauka, “egun urtean 5.809 milioi euro baitira; horietatik, 2.143 milioi gaixotasunarekin lotutako konplikazioei zor zaizkie. Osasunerako aurrekontu osoaren % 8,2 diabetesera bideratzen da”.
Aipatzen da joan den urtean, Diputatuen Kongresuak legez besteko proposamen bat onetsi zuela gailu horiek Osasun Sistema Nazionaleko zorro komunean jasotzeari buruz, eta nabarmentzen da “erkidego guztiak, Nafarroa izan ezik, gailu hauek finantzatzen hasiko direla edo datozen hilabeteetan neurri hau hartuko dutela esan dutela”.
Testuinguru horretan ebazpenak dio Nafarroako 2014-2020 Osasun Planaren barruan, ildo estrategiko bat dagoela, “Gaixotasun baskularren eta diabetesaren prebentzioa eta artatzea”, eta estrategia horren barruan Diabeteserako arreta programa dagoela, zeinak funtsezko ekintza gisa jasotzen baitu autozainketari laguntzeko tresnak erabiltzea.
Consuelo Satrustegi (Geroa Bai) batzordeburu izan da eta bertaratu diren parlamentariak izan dira Begoña Ganuza, Mónica Doménech, Maribel García Malo, Sergio Sayas (UPN), Koldo Martínez, Rafael Eraso (Geroa Bai), Bakartxo Ruiz, Asun Fernández de Garaialde (EH Bildu), Tere Sáez, Fanny Carrillo (Podemos-Ahal Dugu-Orain Bai), Nuria Medina, Inma Jurío (PSN), Javier García (PPN) eta José Miguel Nuin (Izquierda-Ezkerra).
• Mozioa (105. NPAO, 2018-09-07koa)