Hezkuntza Batzordeak ebazpen bat onetsi du gaur aho batez, zeinaren bidez Hezkuntza Departamentua premiatzen baita “gaitu eta egokitu ditzan Lizarrako Remontival HHZren instalazioetan behar diren espazioak hezkuntza-premia bereziak dituzten eskualdeko ikasleei arreta emateko, 21 urtera arte, haien eskolatze-modalitatea hezkuntza bereziko ikastetxe/gela espezifiko batean bada”.

Zioen azalpenean, Izquierda-Ezkerra talde parlamentario mistoak aurkeztutako ebazpenak Lizarrako Remontival HLHIPk Hezkuntza Bereziko gela espezifikoetan arreta jaso behar duten 21 urte arteko inguruko ikasleak hartzeko espazioak egokitzeko aurkeztu duen proposamena aipatzen du, izan ere, Lizarrako lehen hezkuntzako ikastetxe publikoaren proposamenak ikasle horiei arreta eskaintzea ekarriko luke, Iruñerako eguneroko joan-etorriak saihestuz eta Lizarraldeko Hezkuntza Bereziko erreferentziazko ikastetxe bihurtuz.

Hala zehaztuz gero, Lizarraldetik datozen ikasleen arreta hobetuko litzateke, beren bizilekutik eta familia- eta gizarte-ingurunetik hurbilago dagoen giro batean eskolatuko baitira. Bestalde, Andres Muñoz Garde ikastetxean joan den ikasturtetik ikasleen kopuruak gora egin du, eta proposamen honekin, ikastetxe honetan ikasle gutxiago egongo lirateke, eta, beraz, arreta emateko baldintzak hobetuko lirateke.

Patricia Fanlo (PSN) buru izan duen saiora bertaratu diren parlamentariak izan dira Pedro González, Javier García, Jorge Esparza, Iñaki Iriarte, Elena Llorente, Isabel Olave (Navarra Suma), Jorge Aguirre, Inma Jurío (PSN), María Solana, Jabi Arakama (Geroa Bai), Bakartxo Ruiz, Patricia Perales (EH Bildu), Ainhoa Aznárez (Podemos-Ahal Dugu), eta Marisa de Simón Izquierda-Ezkerra).

• www.parlamentodenavarra.es

• Mozioa (52. NPAO, 2020-05-12koa)