MAHAIAK ETA ELEDUNEN BATZARRAK GAUR –ASTELEHENA, APIRILAK 27– EGINIKO BILKURAN HARTUTAKO ERABAKIAK

Nafarroako Parlamentuko Mahaiak eta Eledunen Batzarrak bilkura presentziala egin dute gaur –astelehena, apirilak 27– 10:00etatik aurrera (Osoko Bilkuren aretoa), eta honako erabaki hauek hartu dituzte:

- Mahaiak, Eledunen Batzarrari entzun ondoren, jasotzat jo du Parlamentuko Segurtasun eta Osasun Batzordearen txostena, Osoko Bilkuren aretoaren gehieneko edukierari buruzkoa (21 eserleku), zeinak kontuan hartzen baititu osasun-agintarien gomendioak; besteak beste, COVID-19aren ondorioz segurtasun-distantziako bi metroak mantentzeari dagokiona.

Txosten hori oinarri harturik, erabaki da datorren ostegunean –hilaren 30a– egitekoa den kontroleko Osoko Bilkurari dagozkion eserlekuak honela banatzea: Mahaiko hiru kide ‑lehendakaria, lehen lehendakariordea eta lehen idazkaria‑, bi ordezkari Navarra Suma, PSN, Geroa Bai, EH Bildu eta Podemos-Ahal Dugurentzat, bat Izquierda-Ezkerrarentzat, sei Gobernuarentzat ‑lehendakaria eta bost kontseilari‑, eta Legebiltzarreko legelari nagusia. Mahaiko beste bi kideek, bigarren lehendakariordeak eta bigarren idazkariak, prentsa-kabinetatik jarraituko dute datorren osteguneko kontroleko Osoko Bilkura.

- Mahaiak, Eledunen Batzarrari entzun ondoren, izapidetzeko onartu ditu apirilaren 30eko kontroleko Osoko Bilkurarako aurkeztu diren ahozko galderak.

- Mahaiak eta Eledunen Batzarrak onetsi dute beste bilera bat egitea datorren asteazkenean, hilak 29, 17:00etan. Besteak beste, ebaztearren datorren astean egitekoak diren Gobernuko kontseilarien agerraldietarako eskariak izapidetzeko onartzeari buruz eta antolatzearren ostegunerako, maiatzak 7, deituko den Osoko Bilkura.