Nafarroako Parlamentuko Osoko Bilkurak ebazpen bat onartu du gaur Geroa Bai, EH Bildu, I-E, Podemos-Ahal Dugu eta PSNren aldeko botoekin, PPNren abstentzioarekin eta UPNren aurkako botoarekin, zeinaren bidez “Nafarroako Gobernua premiatzen du 290/1998 Foru Dekretua Nafarroako Urrezko Dominaren kontzesioa arautzen duena alda dezan, Nafarroako gizartearen parte hartzea bermatzeko helburuarekin, baloratu beharko diren proposamen arrazoituak bilduz”.

Onetsitako ebazpenak bigarren puntuan Gobernuari eskatzen dio “herritarren hautagaitzetan oinarritutako prozedura berri bat burutzeko, irizpide harturik haien munta eta baliagarritasuna balio demokratikoak, elkartasuna eta Nafarroako herria defenditzearen eta indartzearen ikuspegitik”.

Era berean, hirugarren atalean Gobernua premiatzen da “domina emateko zioak arrazoitzera, aurreko puntuan azaldutako irizpideetan oinarrituta”.

Gainera, Foru Exekutiboari eskatzen zaio Urrezko Domina “gaurkotasunezko eredua eskaintzen duten pertsonaiei eman dakien”.

Azkenik, Nafarroako Gobernua premiatzen da “parekotasuna kontuan hartzera txandakako urteetan, era horretan konpentsatze aldera sarituen artean emakumerik ez agertzea eta, halatan, alboratu izana populazioaren ehuneko 50ek nafar gizartearen balioen aurrerabideari eginiko ekarpena”.

Onartutako ebazpena Geroa Bai, EH Bildu, I-E eta Podemos-Ahal Duguk (azken hau ekimenaren titularra) aurkeztutako aldatzeko zuzenketa baten emaitza da.

Zioen azalpenean, Podemos-Ahal Duguk bultzatutako ebazpenak kontzesio “bidegabe eta alderdikoiarekin” bukatzea defendatzen du, izan ere, 2014ko azaroaren 17an Parlamentuak sinatutako Itunean adierazi zenez, sari hau “egungo balio demokratikoak ordezkatzen dituen pertsonei lotuta egon beharko litzateke, osotasunari eta leialtasunari ohorea eginez”.

Zentzu honetan eta gizarteak Campión, Olóriz eta Altadilli aitortutako kontzesioa axolagabetasunez hartu ondoren, eta Huarte eta Urmenetarenari aitortutakoan ere sortutako polemikaren ostean, oroitu nahi da, 290/1998 Foru Dekretuan ezartzen denaren arabera, Nafarroako Urrezko Domina “Nafarroako interesen defentsa, promozio edo sustapenean nabarmendu diren pertsona, erakunde, entitate edo taldeen merezimenduak saritzeko ematen da”.

Gauzak honela, sustatzaileak aro berri baten sorrera eskatzen du, “adostasunean eta herritarren parte hartzean oinarrituta”, behingoz “pertzepzio politiko eta sozialari” amaiera emateko eta bere premisatik urrun dauden interesei lotutako sariarekin amaitzeko.

• www.parlamentodenavarra.es

• Mozioaren argitalpena (NPAO, 145. Zk, 2017-11 -27koa)