Publicada el Viernes, 13 de Marzo de 2015

Ikerketa Batzordeak hilaren 20an ondorioak onetsiko ditu

Parte-hartzeko eskaera erabat bazter utzi ondoren, irizpena hilaren 26ko Osoko Bilkurara igorriko da, legegintzaldiko azkena, han behin betiko eztabaidatu eta bozkatu dadin

CANen desagertzeari dagokionez arrazoiak eta erantzukizunak argitzeko sortu zen Ikerketa Batzordea gaur bildu da, eta parte-hartzeko eskaerak egiteko aukera behin betiko bazter utzi ondoren, hilaren 20an ezarri dute irizpenaren ondorioak eztabaidatu eta onesteko eguna.


Gaur ateak itxita egin den saioan adostu dutenaren arabera, talde bakoitzak haren ondorioak eraman beharko ditu hurrengo bilerara, martxoaren 26an egingo den Osoko Bilkuran (legegintzaldi honetako azkena) irizpen bat adosten saiatzeko.


Irizpenaren ondorioak Batzordearen iritziaren arabera ezarriko dira, boto haztatuaren sistemaren bidez, eta, egotekotan, ematen diren boto partikularrak ere izango dituzte.


Osoko Bilkurak onetsitako ondorioak auzitegientzat ez dira lotesleak izango eta ez dute epaien ebazpenetan eraginik izango. Parlamentuko Aldizkari Ofizialean argitaratuko dira eta Foru Diputazioari jakinaraziko zaizkio, nahiz eta Parlamentuko Mahaiak Zerga Ministerioari helaraziko dizkion, behar denean, egoki diren jarduketak egiteko.


Kontuen Ganberaren txostena


Kontuen Ganberak 2000 eta 2012 artean CANek ikuskatu zituen kontuen bilketa jaso du; bai eta CANen Fundazioarenak ere, baina soilik 2013ko ekitaldiari dagozkionak.


Organo zergadunaren arabera, 2000-2012 arteko CANen urteko kontu indibidualen ikuskaritzako txostenek “iritzi positiboa” dute, 2011ko kontuek izan ezik, “salbuespen” agertzen baitute.


Kontuen Ganberak dioenez, 510,69 milioiko aldea dago akzioen eskuratze eta kokatzearen prezioen arteko ezberdintasunaren eraginez. Alde hori “kontuen araudiari jarraiki, 2011ko ekitaldiaren ondorioen kontura egotzi behar zatekeen eta ez erreserben karguko okertze gisa”; hori izan zen ekitaldi horren emaitza itsustea saihesteko hautatu zen aukera. Salbuespen ondorioz, “2012ko urteko kontuetan, informazioa konparatzeko bakarrik, 2011ri dagozkion kontuen egoerak berradierazten dira”.


2013ko ekitaldiari (abian egon zen lehenengo urtea) dagokien Nafarroako Kutxa Fundazioaren kontuei dagokienez, iritzia positiboa da, “salbuespenik gabe”. Kontuen Ganberak azpimarratzen du Fundazioak “Caixa Banken 1.140.000 titulu berri eskuratu zituela, hortaz entitate horren 51.155.625 akzio ditu guztira, 2013ko abenduaren 31n 197,73 milioiko kotizazio balioa zuena (3,788 euro akzio bakoitzeko)”.


Bestalde, Bildu-k eta Aralar-Nabaik hala eskatuta izapidetu diren informazio eskaerek ez dute emaitzarik ekarri. Eskaera horiek “Caixa Bankek eta Nafarroako Kutxa Fundazioak CANen Administrazio Kontseiluko edo beste organo batzuetako kideekin zerikusia zuten pertsona edo enpresei esleitutako kreditu eta maileguei buruzkoak” ziren, “zeinak gobernu korporatiboaren urteroko txostenetan jasota egon behar diren eta ordainean eman diren edo osotara ordaindu gabe kitatu diren”. Fundazioak esan du ez duela informaziorik, eta Caixa Bankek ez du erantzun ere egin.


Martxoaren 2an egin zen batzordearen aurreko saioan, adostu zen informazioa eskatu zaien entitate guztiei azalpen gehiago eskatzea erabaki zen, hartara “dokumentuz dokumentu, zedarritu dezaten zeintzuk diren eskatutako informazioa ukatzeko erabiltzen dituzten arrazoi zehatzak”. Espainiako Bankuak, Kanarietako kutxak eta Nafarroako Kutxaren Fundazioak erantzun egin dute, baina azken horrek egin du soilik eskatzen zen moduan, dokumentuz dokumentu. Caixa Bankek eta Bankuak era ordenatuan berregituratzeko funtsak (FROB) ez dute erantzun.


Batzordeak hurrengo saioa martxoaren 20an egitea adostu du, 11:30etan eta ateak itxita. Onetsi diren ondorioak Osoko Bilkurara igorriko dira bertan, martxoaren 26an eztabaidatu eta bozkatu daitezen.


Adostu denaren arabera, taldeek parte hartzeko eskaeren hasierako zerrenda batekin joan beharko lukete, horretarako onetsi diren arauek xedatzen dutenari jarraiki.


Onetsi diren arauek xedatzen dutenez, Batzordearen xedea da ikertzea arduradunek, Administrazio Batzordea eta Nafarroako Kutxaren Zuzendaritzako kideak, hartutako zein erabaki izan diren Nafarroako Foru Komunitatea egungo egoerara eraman dutenak, bertako finantza-tresna garrantzitsuena eta beharrezkoena galdu baitu, baita prozesu osoak eta burututako abusuek eragin dituzten erantzukizun politikoak zehaztea ere.


Ikerketa Batzordeak egokitu zaien lana amaitzean iraungiko dira, eta bestela, ekitaldia amaitzerakoan.
Ikerketa Batzordearen burua Segio Sayas (UPN) da, baina gainera Carlos García Adanero (UPN), Santos Cerdán, Juan José Lizarbe (Socialistas de Navarra), Maiorga Ramirez, Koldo Amezketa (Bildu), Patxi Zabaleta, Xabi Lasa (Aralar-Nabai), Ana Beltrán eta Amaya Zarranz (PPN), Txema Mauleón, Marisa de Simón (Izquierda-Ezkerra) eta Manu Ayerdi (atxiki gabekoa) parlamentariek osatzen dute.
 

Archivos adjuntos

Archivo adjuntoKontuen Ganberaren txostena